मलंगवा,०४ बैशाख । नेपाल–भारत सीमामा कडाइ बढेसँगै मलङवा बजारमा माछाको आपूर्ति ठप्प हुँदा मूल्य उल्लेख्य रूपमा बढेको छ । सीमापारबाट आउने माछा रोकिएपछि स्थानीय बजारमा अभाव चुलिएको हो । मलङवा नगरपालिका–९ स्थित जनसागर पोखरी बजारमा आज भारतबाट आउने माछा व्यापारीहरूको उपस्थिति न्यून देखिएपछि बजार सुनसान जस्तै बनेको छ । दैनिक रूपमा भारतबाट ठूलो मात्रामा आउने माछामा निर्भर बजार एकाएक आपूर्ति विहीन हुँदा मूल्यमा तीव्र उछाल आएको देखिएको छ । बजार व्यवस्थापनसँग जोडिएका साझेदार हारुण बैठाका अनुसार हाल रोहु र बिझठ माछा प्रतिकेजी ४०० रुपैयाँमा बिक्री भइरहेको छ भने गइँचा माछा ११०० रुपैयाँ प्रतिकेजीसम्म पुगेको छ । “अहिले मागअनुसार आपूर्ति नभएकै कारण मूल्य बढेको हो,” उनले बताए ।
भारतीय एक ब्यापारीका अनुसार भारतको सोनबरसाबाट सधैं माछा लिएर आएर मलंगवाको बजारहरुमा बेच्दै गरेकोमा आज सिमामा माछा ल्याउन अनुमति नदिएकोले नेपाली माछा नै खरिद गरी बेचिरहेको बताए । स्थानीय व्यापारीहरू भन्छन्, केही दिनअघिसम्म सहज रूपमा उपलब्ध हुने माछा अहिले सीमित मात्रामा मात्र पाइरहेका छ ।