सर्लाही,२५ चैत । जिल्लाका अधिकांश स्थानमा आज बिहानदेखि मौसम धुम्म बनेको छ भने केही ठाउँमा हल्का वर्षा भइरहेको छ । देशका विभिन्न भागमा वर्षा भइरहँदा यसको प्रभाव सर्लाहीमा पनि देखिएको हो । जल तथा मौसम विज्ञान विभाग अन्तर्गतको मौसम पूर्वानुमान महाशाखाका अनुसार हाल मधेशप्रदेशका विभिन्न जिल्लामा वर्षा भइरहेको छ । वर्षा गराउने प्रणाली क्रमशः पूर्वतर्फ फैलिँदै गएको जनाइएको छ ।
महाशाखाका अनुसार पश्चिम नेपालबाट अर्को वर्षा प्रणाली समेत नेपाल प्रवेश गरिसकेको छ। यसको प्रभावले गण्डकी प्रदेश, लुम्बिनी प्रदेश र बागमती प्रदेश का धेरै स्थान तथा अन्य प्रदेशका केही स्थानमा पानी परिरहेको छ ।
महाशाखाले आज र भोलि देशका विभिन्न ठाउँमा मेघगर्जन, चट्याङ, हावाहुरी तथा असिनासहित वर्षा हुने सम्भावना रहेको जनाएको छ। सम्भावित जोखिमलाई मध्यनजर गर्दै सर्वसाधारणलाई सतर्कता अपनाउन अनुरोध गरिएको छ ।
