सर्लाही, २३ चैत । सरकारी निर्णयपछि सुरु गरिएको कारबाहीका कारण सर्लाहीका मालपोत र नापी कार्यालयमा सेवा प्रवाह प्रभावित भएको छ । प्रहरीले लेखापढी व्यवसायी तथा सहजीकरणको काम गर्दै आएका व्यक्तिमाथि धरपकड थालेपछि कार्यालयहरूमा कामकाज अस्तव्यस्त भएको हो । हिजो जिल्ला प्रहरीको सक्रियतामा मलंगवास्थित मालपोत कार्यालयबाट सात जना र यातायात व्यवस्था कार्यालयको ट्रायल सेन्टरबाट दुई जनालाई नियन्त्रणमा लिइएको थियो । उक्त कारबाहीको विरोधमा लेखापढी व्यवसायीहरूले आज ‘पेन डाउन’ गर्दै काम बन्द गरेका छन् ।
मालपोत कार्यालय बाहिर बसेर सेवा दिँदै आएका लेखन्दासहरूले काम नगर्दा अनलाइन इन्ट्रीदेखि विभिन्न कागजी प्रक्रिया रोकिएको छ । यसका कारण सेवा लिन पुगेका सेवाग्राहीहरू प्रत्यक्ष रूपमा प्रभावित भएका छन् । “सरकारले वैकल्पिक व्यवस्था नगरी अचानक यस्तो कदम चाल्दा हामी मर्कामा प¥यौं,” एक सेवाग्राहीले गुनासो गरे । लेखापढी व्यवसायीहरूले पनि आफ्नो रोजगारी संकटमा परेको बताएका छन् । “यति वर्ष यही काम गरेर गुजारा चलाएका छौं, अब यो उमेरमा आएर कसरी जीविकोपार्जन गर्ने?” एक व्यवसायीले दुखेसो व्यक्त गरे ।