सर्लाही, २० चैत — सर्लाहीको गोडैता नगरपालिका–५ रामवनस्थित श्री जनता माध्यमिक विद्यालयमा सञ्चालन भइरहेको क्भ्भ् परीक्षाका क्रममा मोबाइल प्रयोग गरी प्रश्नपत्र बाहिर्याउने प्रयास गरेको आरोपमा आज तीन जना परीक्षार्थीलाई नियन्त्रणमा लिइएको छ । बिहान परीक्षा चलिरहेकै समयमा केही परीक्षार्थीले मोबाइलमार्फत प्रश्नपत्र ‘आउट’ गर्न खोजेको पत्ता लागेपछि केन्द्राध्यक्षले उनीहरूलाई नियन्त्रणमा लिएर त्यहाँ खटिएको प्रहरीलाई बुझाएका थिए । नियन्त्रणमा पर्नेहरूमा बलरा नगरपालिका–८ गडहिया डुमरियास्थित श्री नमुना माध्यमिक विद्यालयका पृतम यादव र आलोक यादव तथा गोडैता नगरपालिका–५ रामवनस्थित श्री नारायण हरि माध्यमिक विद्यालयका सुमित यादव रहेका छन् ।
इलाका प्रहरी कार्यालय हरकठवाबाट प्रहरी नायब निरीक्षक पदमबहादुर खड्काको कमाण्डमा खटिएको टोलीले उनीहरूलाई नियन्त्रणमा लिएर इलाका प्रहरी कार्यालय बरहथवामा लगिएको छ । हाल घटनाबारे थप अनुसन्धान भइरहेको प्रहरीले जनाएको छ ।
