सर्लाही,११ पुस । सर्लाही लगायत मधेशमा अत्यधिक चिसो बढेको छ । मानिसहरूले चिसो छल्न दाउरा, गुइँठा र कोइला बालेर ताप्न थालेका छन् । शीतलहर फैलिएका कारण सर्लाहीमा मानिसहरू अत्यावश्यक कामबाहेक घरबाट बाहिर निस्किएका छैनन् । मौसम पूर्वानुमान महाशाखाका अनुसार मधेशका विभिन्न ठाउँमा हुस्सु÷कुहिरोले ढाकेर शीतलहर फैलिएको छ । सर्लाहीमा पुस ३ यता शीतलहर देखिएको हो । चिसोबाट बच्न आगो ताप्दा जलनका घटना बढेका छन्। प्रादेशिक अस्पताल मलंगवामा जलन र हाइपोथर्मियाका बिरामीको संख्या थपिइरहेको चिकित्सकहरूले बताए । अस्पतालका चिकित्सक डा. सचिन यादव तापक्रम घटेपछि हाइपोथर्मिया, जलन, भाइरल निमोनिया, कोल्ड डायरिया, दम तथा मुटुसम्बन्धी समस्याका बिरामीको संख्या बढेको बताउँछन् । उनका अनुसार अस्पतालमा आउने अधिकांश हाइपोथर्मिया र जलनका बिरामी गरिब, मजदुर, वृद्धवृद्धा, बालबालिका तथा खुला स्थानमा बसोबास गर्ने ग्रामीण क्षेत्रका व्यक्ति हुन् ।यादवले ‘उपचार गराउन आउने बिरामीमध्ये धेरैजसो हाइपोथर्मिया, जलन, भाइरल निमोनिया, कोल्ड डायरिया, दम र हर्ट अट्याकबाट पीडित छन्। तीमध्ये हाइपोथर्मिया, जलन र भाइरल निमोनियाका बिरामीको संख्या बढी छ।’चिकित्सकका अनुसार बाहिरी चिसोको अत्यधिक प्रभावले शरीरको तापक्रम घटेपछि चिसोबाट बच्न आगो ताप्ने क्रममा जलन हुन सक्छ। लामो समयसम्म चिसोमा बस्दा शरीरको तापक्रम असामान्य रूपमा घटेर हाइपोथर्मियाको समस्या देखिन्छ।मधेश क्षेत्रमा घरभित्र दाउरा, कोइला र गुइँठा बालेर झ्यालढोका बन्द गर्दा निस्कने धुवाँ बाहिर जान नसकी अक्सिजनको मात्रा घट्छ। यस क्रममा कार्बन मोनोअक्साइड शरीरमा प्रवेश गर्दा श्वासप्रश्वासमा समस्या हुन्छ र ज्यानसमेत जाने जोखिम हुन्छ।’चिसो हावामा बस्नु, पर्याप्त न्यानो लुगा नलगाउनु, भिजेको कपडा लगाउनु, राति खुला स्थानमा सुत्नु, पोषणको कमी तथा घरभित्र आगो बाल्दा निस्किने धुवाँ हाइपोथर्मियाका प्रमुख कारण रहेको चिकित्सकको ठहर रहेको छ ।