दैलेख। ने.क.पा (एमाले) चामुण्डाबिन्द्रासैनी नगर कमिटीको बैठक सम्पन्न भएको छ। बैठकमा आगामी भदौ २० देखि २२ गतेसम्म हुने विधान महाधिवेशनमा संशोधन गर्नुपर्ने विषयबस्तु सम्बन्धी एजेण्डामाथि मात्र विस्तृत छलफल गरिएको छ।
बैठकको अध्यक्षता पार्टी नगर कमिटीका अध्यक्ष रङ्गबहादुर तामाङले गर्नुभएको थियो भने बैठकको सञ्चालन नगर कमिटीका सचिव कर्णबहादुर बिष्टले गर्नुभएको थियो।
बैठकका प्रमुख अतिथि निर्वाचन आयोगका केन्द्रीय सदस्य सूर्यबहादुर शाही रहनुभएको थियो। विशेष अतिथि प्रदेश कमिटी सदस्य तथा चामुण्डाबिन्द्रासैनी नगर कमिटीका इन्चार्ज वीरबहादुर शाही रहनुभएको थियो। त्यस्तै, अतिथिहरू नगर कमिटीका सदस्य अनेरास्ववियु चामुण्डा कलेजका पूर्व कोषाध्यक्ष लोकेशबहादुर शाही अनेरास्ववियु दैलेख जिल्ला कमिटीका उपाध्यक्ष सुन्दर शाही, नेपाल उत्पीडित जाति मुक्ति समाज चामुण्डाविन्द्रासैनी नगरपालिकाका अध्यक्ष उज्जिर बिक लगायत जिल्ला कमिटी सचिवालय सदस्यहरू र पार्टी जिल्ला कमिटीका सदस्यहरूको समेत उपस्थिति रहेको थियो।
बैठकमा विधान महाधिवेशनका लागि आवश्यक तयारी, संशोधनका प्रस्तावहरू र कार्यान्वयन प्रक्रियासम्बन्धी सुझावहरू प्रस्तुत गरिएको थियो।