काठमाण्डौ । सिङ्गापुरलाई २ विकेटले पराजित गर्दै नेपालले एसीसी १६ वर्षमुनिको इस्ट जोन कप क्रिकेटको उपाधि रक्षा गर्न सफल भएको छ।

मलेशियाको बाङ्गीमा भएको फाइनल खेलमा सिङ्गापुरले दिएको ११४ रनको लक्ष्य नेपालले २९ ओभरमा ८ विकेट गुमाउँदै पूरा गर्‍यो।

५८ रनमा ५ विकेट गुमाएको नेपाललाई जोए थापा (२४* रन) र शुभम् खनालले छैठौं विकेटका लागि ३३ रनको महत्त्वपूर्ण साझेदारी गरे। अन्त्यतिर जोए थापा र अभय यादवले ९२-८ को अवस्थामा २५ रनको नटआउट साझेदारी गर्दै टोलीलाई जित दिलाए।

यसअघि टस जितेर पहिले ब्याटिङ गरेको सिङ्गापुर ४० ओभर ५ बलमा ११३ रनमै अलआउट भएको थियो। नेपालका सुशील रावल र अभय यादवले समान ३/३ विकेट लिए। सिङ्गापुरका लागि कपिश वेन्कटरमनले उत्कृष्ट प्रदर्शन गर्दै ४ विकेट झारे।

नेपाल यस प्रतियोगिताको साविक विजेता समेत हो।