पञ्चकोशी संवाददाता । अलविदा’ शब्द लेखिएको सुसाइड नोट फेसबुकमा सार्वजनिक गरी मोबाइल फोन अफ गर्दै बेपत्ता भएका डाक्टर केशव श्रेष्ठ बालाजुमा सकुशल फेला परेका छन्।
उनको खोजीका लागि जिल्ला प्रहरी परिसर, काठमाडौंबाट टोली परिचालन गरिएको थियो। प्रहरीले बालाजु क्षेत्रबाट उनलाई सोमबार बिहान फेला पारेको जनाएको छ। हाल उनी सुरक्षित अवस्थामा रहेको र थप आवश्यक अनुसन्धान तथा स्वास्थ्य परीक्षणका लागि सम्बन्धित निकायहरूसँग समन्वय भइरहेको प्रहरी स्रोतले जानकारी दिएको छ।
केशव श्रेष्ठले बेपत्ता हुनु अघि फेसबुकमार्फत आत्महत्यासँग सम्बन्धित सन्देश पोस्ट गरेका थिए, जसले परिवार, मित्रजन तथा आम सर्वसाधारणमा चिन्ता उत्पन्न गराएको थियो। घटनापछि प्रहरी, परिवारजन र शुभेच्छुकहरू उनको खोजीमा सक्रिय थिए।
यस सम्बन्धमा थप अनुसन्धान जारी रहेको जिल्ला प्रहरी परिसर, काठमाडौंले जनाएको छ।