भाद्र ६/धनगढी

कैलालीमा मङ्गलबार रातिदेखि परिरहेको अविरल वर्षाले जनजीवन प्रभावित भएको छ। अविरल वर्षापछि आएको बाढी बस्तिमा पसेपछि कैलारी गाउँपालिका ,भजनी नगरपालिका ,जोशीपुर गाउँपालिका र गौरिगङ्गा नगरपालिकाका करिब पाँच सय घर प्रभावित भएका छन्। बस्तिमा बाढी पसेपछि घरमा असर गर्नुका साथै खाद्यान्न, लत्ताकपडा ,बालीनाली र पशुचौपायामा असर गरेको छ।

लगातार वर्षाले सबै खोला, नाला, नदीमा पानीको सतह बढेपछि आएको बाढी हालसम्म घटेको छैन। बाढीले कैलारी गाउँपालिका, भजनी नगरपालिका, र गौरीगंगा नगरपालिकाको अधिकांश क्षेत्र डुबानमा परेको छ। बुधबार राति तीन घण्टासम्म पनि कैलालीको विभिन्न स्थानमा भारी वर्षा भएपछि जनजीवन थप कष्टकर बनेको छ। डुबान प्रभावित क्षेत्रका स्थानीयमा रातभरि बिचल्ली भएको बताइएको छ।